Записъ Стецков Петрашенков на купълене половыни сѣножати в Хомы Деркаченъка на Говтве, 1671 року

 95. (л. 223).

Записъ Стецков Петрашенков на купълене половыни сѣножати в Хомы Деркаченъка на Говтве.

    Року 1671, мсця іюня 17 дня.

    Пред насъ Демка Яковенъка, атамана городового, и при бытности Сави Игнатенъка, асавула полкового, Петра Мисенъка, Петра Тытенка, Миколая Стефановича, Семена Яременъка, войта, Левка, бурмистра, и при многих общих зацных особахъ.

    Доходилъ Стецко Петрашенко сѣножати Хоминой на Говътве, которой боронилъ по одестю Хомыном в слободы, не попоскаючи нѣкому, хотѣлъ любо би купъленим способом од Хоми ку своему пожиткови тую помененную сѣножат обернути, где по зверненю Хомином з слобод владѣлъ Хома Деркаченъко, якъ своею власною, а напотом без вѣдома Стецкова продал Гаврилови за вола, которий волъ в ценѣ пол-осми копи. Теди Стецко, яко несвѣдомий того торгу, одезвался к той сѣножати, будучи и перве оборонцею тое сѣножати предреченой, и не хотячи Гаврилови Gуджуленъку попустити, жадалъ Стецко, любо би при половици тое сѣножати мог зостават.

    Теди-смо и того Хому припозвавши, яко теж и Гаврила Кгуджуленка, згодили Стецкови тое сѣножати половина од Стецковой от сажки по дуброву, а Гаврилови кутъ от Дороша к стану Кгуджулову. Где Хома, стоячи, повидѣлъ: Хто заплати то заплати абы минѣ грошѣ. Где того ж часу словне собѣ Стецко и Гаврило ствердивши, дал Стецко Гаврілови за тую половини сѣножати Хоминой десят зол: без чотирох шагов, а Гаврило, взявши за пазуху грошѣ, прощеніе з Стецком отрималъ.

    Мы теж по их умѣркованю позволяем вѣчне владѣти Стецкови половиною тое сѣножати, а Гаврилови од своей сторони од Кгуджоловой втож половиною вѣчне владѣти и потомком их, ижбы в том болших заводов правных от обох сторонъ не вщинано, под виною до шъкатулы войсковой двадцати таляров, а на вряд городовый Пулътавский копъ трохъ.

    То-смо на жаданя Стецково Петрашенково для свядомя и на потомные часы велѣли до книг н-ших меских Пулътавских вписати, що и ест вписано, року и дня вышъ менованъного.

 

Принятий записъ, Петрашенкам поданий от Решетиловцовъ, и записан до книг меских Полтавских, 1669 г.

 154. (л. 112).

Принятий записъ, Петрашенкам поданий от Решетиловцовъ, и записан до книг меских Полтавских слово в слово, которий ся в собѣ такъ мѣетъ:

    Року 1669, іюня 18 дня.

    Мы всѣ едностайне товариство и мещане городка Решетиловки даем сее писаня п-ну Стецку Петрашенку самы на себе: еслибъ которий наш товаришъ, албо и мѣщанинъ послѣ сего разу мѣлъ буть в байраку Петрашенковом и рубат, такий нехай сам за себе отбувает и своѣем статком, и на такого даем сей нашъ декрет: волно ему, як п-ну в своем добром; и даем сие наше писаня сами на себе при п-ну полковнику Полтавском п-ну Хвылону Горкушѣ и при всем товариству Полтавском, и при п-ну есавулу полковом Юрку Тубулченку, и при Івану Рососѣ, и при ином товариству.

Року 1669, іюня 18 дня.

    Андрей Бартос, атаманъ городовый Решетиловский, зо всѣм товариством и посполством.

    Где-смо и мы, старшие Пултавские, то писмомъ ствердивши и под оповѣд принявши, предо мною Филоном Горкушею, полковником войска Запорожского Полътавским и при битности Клима Чорнушенка, атамана городового, Юрка Тубулченка, асаула полку Полтавского, Хведора Бутка, судѣ, Леска Черняченка, сотника полкового, и при многом товариству, з уряду теж меского Левка Хорощенъка, войта, Грицка Щербатого, бурмистра, и при иних зацных особах, позволяем и у моцъ подаем Петрови Петрашенъковы воловъ два, еденъ сѣрий, а другий рябий, которих помененнмй Петрашенко взялъ за шкоду свою о спустошеня байрака на Говтве от Решетиловцов; теды тыми волами повинен вѣчне владѣти, яко своѣми власними; а где би ся якая ли колвекъ особа важила спромежъ Решетиловцовъ тых воловъ доходити в якого ли колвекъ суду и права, взновляючи и повтряючи тую справу, на такового вкладаем вини до шкатули войсковой таляров сто, а на врядъ городовый таоярей десят безотпустне, а за для стверженя и для свидоми велѣли-смо то в книги меские Полътавские вписат, що и ест записано, року и дня вышъ менованго.