Справа Его Мыл: Пана Василия Кочубея, Писара Войскового Енералного, точачаяся з Іваном Шолудченком, 1696 г.

307. / — 293. —

№ 400

Справа Его Мыл: Пана Василия Кочубея, Писара Войскового Енералного, точачаяся з Іваном Шолудченком, о надтесаню на два цалѣ бруса, на лотокахь будучого, ним же, Шолудченком, потаемне, в потомние часи, ест в книгах наших мѣских Полтавских записана, которая таковий в собѣ текстъ.

Року Божого тисяча шест сотъ девятдесят шестого, мѣсяця Ноеврїя, двадцет осмого дня.

   За вѣдомомъ Его Мыл: Пана Івана Іскри, Полковника Войска Его Царского Пресвѣтлого Величества Запорозкого Полтавского.

   Пред нами, Петром Буцким Судїею Полковым, при битности Івана Красноперича Атамана Городового, Григория Василевыча Войта, Григорія Юревича Бурмистра, и при многих значних общих персонахъ.

   Ставши очевисте, Панъ Іванъ Колачковский, Господар Его Мыл: Пана Писара Войскового Енералного, и п: Левко Кублицкий, Войть Его ж панское маетности Диканское, чинили оповид и ускаржалися на Івана Шолудченка, мелника и жителя Будиского, в той способ: "Же мененный Іванъ Шолудченко, маючи и в себе млива на рецѣ Ворсклѣ, в Будищах, на греблѣ вышшой, при млинах Панских з особною скринею, два каменѣ, и третие ступи, теперъ, без вѣдома нашего, не знати з якое причини, уймуючи воды на своемъ спустѣ, бруса на два цалѣ надтесав і опустив низше немало, з чого немалая панским доходам чинитися шкода и уйма, од самого часу робочого, ажь до сего времены, бо за такимь надтесанем бруса вся вода на его лотоки повернулася, и що панских два каменѣ, тое можетъ его, Івановъ, одинъ камен викинути. Прето мы, такую его, Іванову, видячи неправост и убитокъ панскому добру, просим з него святое справедливости". Припозваный теж и обжалованный мелникъ Шолудченко признался: "А що ж, Панове, я о том и до сего часу не вѣдал бы, если мои лотоки вишши и од панских, чили ровни, але, якъ ознаймил мнѣ Максим Качка, мѣрочник Василя Череватого Опошанского, що мой спрутъ вишший на три цалѣ, прето я, сказавши мирочниковѣ панскому Хвесковѣ, що тот Качка повѣдал, просилем того ж Хвеска, мѣрочника панского, жеби он з моимъ мѣрочникомъ Опанасенкомъ, брусъ зашнуровавши, на два цалѣ оного стесавъ, якож и сталося, а при той работѣ стоялем ми з братом моим Пархомом. Толко в том моей и вини, щом а ни пана господара, а ни п: войта, до такого дѣла не звѣстивши, подтѣсовати бруса важилемся".

   СУДЪ НЫНѢШНЫЙ, вислухавши акторское сторони жалобы и оскаржоного отповѣди, а не потребуючи болшъ жадных доводов, а нѣ свѣдоцства, над тое, яко оной мелникъ Шолудченко сам доброволнеся признал, іжъ без вѣдома панских господаровъ на своей скринѣ бруса на два цалѣ надтесавъ, да и на людий, якие би мѣли его неслушност познати, здаватися теперъ, познавши свою явную выну, з тых мѣръ далей права надиляцїю не откладаючи, узналъ оного быти винним и наказал, абы онъ, Шолудченко, яко явный подступца и добру людскому шкодца, тот брусъ знову по прежнему направилъ, колко ест шкоды од того часу, якъ млины панские за пониженемъ бруса ваковали, нагородил, и правние наклади всѣ от мала и до велика поворочал. А зособна той же сторонѣ укривжоной кгвалту дванадцет рублей грошей подлуг права, в Статутѣ Князства Литовского в роздѣлу девятом в артикулу двадцет первом положоного, абы заплатил и во всемъ поеднал конечне, при заплаченю вины Его Мыл: Пану Полковниковѣ Полтавскому и Урядови належное. Справу сию скончивши, велѣлисмо до книг наших мѣских Полтавских записати, що и записано. Дѣялося в Ратушу, року, мѣсяця и дня звышъ положоного.

Роман Лозинскый, писар мѣскый Полтавский, рукою.