Записъ Савинъ Педашенков и Максимов Попенковой Войтов на купълене половини сѣчи на Берестовѣ в Данила Хведенка, Якова Иваненка Стрѣлченъка, 1677 г.

Арк. 40.

№ 73

Записъ Савинъ Педашенков и Максимов Попенковой Войтов на купълене половини сѣчи на Берестовѣ в Данила Хведенка, Якова Иваненка Стрѣлченъка.

Року Божія  АХОЗ  (1677)  мѣсяця марта  КВ  (22)  дня.

   Пред насъ, Петра Жученъка сотника Полкового и на мѣсцу Полковницком зостаючого, Кости Кублицкого судѣ Полкового, Олешъка Кованки Атамана Городового и при многих зацних персонах.

   Ставши пред нами, Данїло Хведенко села Кгуджуловъ, с притомностю приятеля его Якова Стрѣлченка, вызнали ясне доброволне ку записаню до Книг Мѣских Полтавских, в тые слова повѣдѣвши: 

“Панове, з доброй воли нашой продали-смо Пану Савѣ Педашенкови и Пану Максимови Попенкови Войтови половину сѣчи на Берестовѣ внизъ Ушивой до броду, к шляху из узменями, за которую половину тое сѣчи взяли-смо в реченних готовых грошей Сѣмъ копъ. Волно им будетъ тоею половиною сѣчи и узменями вѣчне владѣти, дати, продати и на свой пожитокъ, якъ хотѣти обернути, перешкод и турбаций правних нѣ от кого не узнавши, такъ от насъ самыхъ, яко и от всѣх близких и далних кревних и повиноватих наших.” 

   Мы, тую мову слышачи от уст Даніловыхъ и от Якововых, купълю сию велѣли-смо в Книги Мѣские Полтавские вписати, що и естъ вписано.