Федорова Колесникова, мещанина и ктитора Николъского, духувница, 1672 г.

— 6 —

9 (л. 2 об.).

Федорова Колесникова, мещанина и ктитора Николъского, духувница принята до книгъ наших мѣскихъ Пулътавских в року бжомъ 1673, мсця февраля 20 дня и переписана слово в слово, которая так ся в собѣ мѣетъ:

   Во имя отца и сна стго дха, стан се ку вѣчной памяти ніжей описанъной речи, аминь.

   Иж всѣ речи с памяти людской вспливаютъ і в забытие ума приходятъ, теди бываютъ писмомъ обяснени, иже межи кревними бываютъ распри, свари, що я, Феодор Івановичъ Колесникъ, обывател Полтавский, памятаючи на тое, же кождый чловекъ, который ся на свѣтъ уродилъ, сподѣвается хоробы, а в хоробѣ смерти, которая жадного чловека не можетъ оминут, прето я, еще бывши здоровимъ и при розумѣ сталим, порядок чиню, жебы напотимъ межи дѣтъками и покревними моими жадной алтеркаціи не было, чому я запобегаючи, абы на томъ преставали, що тутъ кому будетъ специфѣковано: обетація моя, в которой я мешкаю, нѣ в чомъ не пѣнна, сину моему Михайлу поручаю, нѣхто до того справи жадной не маетъ. 

  Грицко, зят муй, на чомъ сыдитъ, на том нехай престаетъ, що на Стасовцях Грицкові, зятеви, нивъ чотири и в Безручковой луцѣ нива с клыномъ и половына подмета и к валъку, якъ яблунка, нива, в межу с Курилом; 

  в Худяковой луцѣ нива, в толоцѣ и, к Рибцюмъ идучи, помѣрокъ, а другий помѣрокъ и к рудцѣ из шуриномъ в межу; 

  на Полузорѣ двѣ нивѣ из Грицкомъ, шуриномъ, в межу оби-двѣ; 

  за Шостакамы десят ступеней, тые всѣ нива сну моему Михайлови. 

  Сщенику отцу Іосифу, дховному моему, нива у ворутъ, в межу з Марченком, которую за дшу жони моей, що Гсда Бга проситъ, тую-мъ отдалъ. 

  И  еслибы-с, мѣлъ упоминати Іванъ, синъ Маслакувъ, хату я продалъ за шест копъ тоежъ отцу Никифору, за дшу матки его отдалъ, и що-с позосталое худобы зостало, тое его баба все побрала. 

  А хтобы са важилъ тотъ муй тестаментъ касовати і албо преставлять, таковый нехай будетъ проклятъ анафема і арамафа и росправится за мною на оном страшномъ судѣ пред судиею нелицемѣрномъ , где кождому заплачоно будетъ по дѣломъ его. 

  Дѣялос в дому братерскомъ, пры вел: гсдну отцу Іосифу, сщенику стого Николи, при пану Мыкитѣ, брату старшомъ, при пну Евфимию Конъвѣсару, при Григорию Дерипасцѣ, при Хомѣ Шевъченку, при Савѣ Заяцю и при многих общих особахъ, року бжого 1672, мсця февруарія 20 дня.

_______