Запис Рябушенковъ Пушкарувских на роздѣленя грунтовъ, 1684 г.

Арк. 200.

№ 297

Запис Рябушенковъ Пушкарувских на роздѣленя грунтовъ, которий так ся в собѣ мѣетъ; и принятъ до Книгъ мѣских Полтавских.

Року Божого  АХПД  (1684) , мѣсяця июня  КS  (26)  дня.

   Пред насъ, Кости Кублицкого Судѣ Полку Полтавского, Андрея Нащинского Атамана Городового, Федора Суховѣя Войта, Петра Юревича Бурмистра, и при многих общих зацних персонахъ.

   Постановившися пред судъ нашъ, Хведор Кузменко Рябушенъко, с притомностю рожоних братовъ своихъ Ивана и Гапки Іванихи вдовы другого Ивана, Олексѣя и Василя Рябушенковъ, жадали и просили насъ о слушний дѣлъ и розграничене в кгрунтѣ их отцевскомъ, на Пушкарувцѣ.

   Мы, на жадане и на прозбы реченнихъ рожоних приятелей изволивши, висилаем з Уряду нашего Пана Миколая Степановича и Петра Юревича Бурмистра, абы тамъ слушне, правдиве углядѣвши в тие кгрунъта, кому що належна роздѣлили, ижъ бы и в потомние часи не было в томъ дѣлу алтернаций и заводовъ правних. Которие висланние наши, бывши на томъ слушномъ дѣлѣ и розграниченю, такъ сказали: “Меншимъ, Олексѣеви и Васылю, Ставок з млинкомъ и хата в мѣстѣ обомъ без паи, пополамъ, а в дубровѣ и в нивю, в полю, старшому братови Хведорови част от Гончаревой Левады, Василевѣ ведле Хведора, Олексѣеви ведле Василя, Иванисѣ вдовѣ ведле Алексѣя, Івановѣ другому середулшому виш ставъка садокъ маленкий, Василеви, Олексѣеви зо всего кгрунту на збудоване хати по два дуби, Дорога кождому мѣетъ быти волная, Олексѣеви плец такъже, якъ инъшой братѣ, без паи, Огорожа в ровний дѣлъ мѣетъ быти,” А которий бы мѣлъ с кревних реченнихъ приятелей справу сию взнуряти, таковий кождий повиненъ будетъ выни платит Пану Полковникови Полтавскому талярей сорокъ, а на вряд Мѣский Полтавский таляровъ двадцят безотпустне.

   Справу сию сконъчивши, велѣли-смо записати. 

№ 298

Повторное огляданя розграниченя тогожъ крунту.

Року Божого   АХПЕ  (1685) , мѣсяця июня   ВІ  (12)  дня.

   Пред насъ, Федора Жученка, Полковника войска их Царского Пресвѣтлого Величества Запорозкого Полтавским, и при бытности Петра Буцкого Судѣ Полку Полтавского, Андрея Нащинского Атамана Городового, Андрея Яковлевича Войта, Петра Юревича, Криска Иосифовича Бурмистровъ, и при многих зацних персонахъ.

   Пришедши пред насъ, Гапъка Иваниха, невѣстка Рабушина, жадала насъ и ускаржалася пред нами на Марю Василиху, втожъ невѣстъку Рябушину, вдову, якобы ся кривда дѣет в розграниченю кгрунтовъ небожчикових Рябушиних, вряловне в ровний дѣлъ на пят частей, которий дѣлъ былъ в року  АХПД  (1684)  Миколаемъ Стефановичомъ и Петромъ Юревичомъ. На чом и стануло и зарукою обваровано, аже Гапка Иваниха, не контентуючися тимъ дѣлом слушнимъ, а взнуривши тую справу, ложъ тому розграниченю кгрунтовъ даючи, зажида нас, абы-смо Мы, углядѣвши особою своею в розграниченю, кому б ся тамъ кривда дѣяла. Теди-смо Мы, Полковник Полтавский Федоръ Жученко з судею Полковимъ Петром Буцкимъ и Петромъ Юревичом Бурмистромъ Полтавским Мѣскимъ, и з Миколаемъ Стефановичом, и з Максимомъ Яровимъ Атаманомъ Пушкаровскимъ, и з иншими людми зацними Пушкаровскими, увидѣвши, же тенъ кгрунтъ, якъ перше на пятъ частей роздѣленъ слушне, а Иваниха Гапка правѣ безвинне невѣстку свою Марю Василиху вдову правне турбуетъ, справу взновивши, мало дбаючи и о заруцѣ вложоной, оную Иваниху Гапъку, невѣстку Рябушину, осудили-смо винною быти, и мѣетъ на чом би укривжоная сторона зостала, упросивши, правние виклади нагородити, на чом бы шкодовала, при заплаченю вини Панской, яко ест вишей положоно, талярей сорокъ, а на вряд Мѣский Полтавский талярей двадцят, а кгды бы еще якая сторона важила б справу сию взновляти ку перешкодѣ тих роздѣлених кгрунътовъ, таковий противний попадает у вину повторне совито сто таляровъ. 

   Про память и в далшие часы велѣли-смо тое в книги Мѣские Полтавские вписат, що и ест вписано, року и дня вишъ положоного.