Справа Перехриста Смѣлянского и Ганны Стрѣлихи, 1664 г. (продолжение)

6. (л. 17).

   Рок 1664, мця октовърия 28 дня.

   Предо мною Михайлом Гончаром, на мѣстцу полъковъницком, и при мнѣ бивших Манца Хведоровича, атамана, Петра Карповича, войта, Васка Кошляка, бурмистра, райцовъ меских Полътавъскихъ.

   Ставши к той справе, Яцко Перехристъ Смѣлянский давалъ з себе слушний вывод Ганнѣ Стрѣлисѣ прячися, же жадною мѣрою а нѣмъ грошей от Стрѣли не бралъ и не вѣдаю его, навет кгды бы то мѣло би ся на мене показат, худобу от мала до велика повиненъ буду тратит, навет карное на горле самъ на себе вкладаю. Теди-смо, слишачи то от Яцка, казали наочне Ганнѣ Стрѣлисѣ ставит Петра Дейнеку Смѣлянского, иж бы того доводилъ Яцку Перехристе. Видячи теди Петро фалшивое свое вданя, не ставъши перед вряд, скрилъся.

   Теди мы, вряд меский Полътавъский, уваживъши, же Петро, не вѣдаючи навет імени Яцкова, Михалъкомъ меновалъ, фалшивого свѣдка мѣем Петра Дейнеку, а Яцко ІІерехрист, яко вѣры годний; позволивъши Яцку, где би мог постигнет Петра Дейнеку, правне з ним поступовал, всей утрати своей и правних выкладовъ доходячи, где би ся мѣла тая справа приточит. Тую-смо справку казали въ книги меские Полътавъские записат, що и ест записано.

_________