Монастиру Печерскому, 1675 г.

48  (л. 20 об.).

Монастиру Печерскому.

   Року бж: 1675, мсця иануар: 30 дня.

   Пред нас, Кости Кублицкого, суди Полку Полтавского, Демяна Кгуджула, атамана городового, Максима Попенка, войта, Левка, бурмистра, и при многих общих особах. 

   Постановившися, Грицко Котко мовил: Варуй, бже, пнове! Жадною мирою не хощу ся втручат, а ни потомки мои, в хуторецъ, которий трималем болшей десяти литъ, неподал от сичи Локошчиной; а поневаж тепер тая сич зостает при монастиру Печерскому и не мусит быти оной от мене без перешкод, уступилем доброволне, с тых  кошар, полецивши и тую частку к той-же сичи Печерской; волно им будет вичне и моею частю владити, жадних перешкод не узнавши. 

   Мы, тые слова слышачи от Грицка Котка, велили записат, року и дня вышъ менованъного.

———————