Записъ Оленин Прокопишин з Жуков на куплене gрунътовъ, 1669 г.

86  (л. 41).

Записъ Оленин Прокопишин з Жуков на куплене gрунътовъ принятъ до книг и переписан в тие слова, которий такъ ся в соби миетъ:

   Я Іван Корниленко, обывател Мерехвянский, видомо чиню сим писмом моим, иже-м з добро[й] воли моей продал поле с синожатми и зо всим нивемъ, где-бы якая нива знайти мила, поблизу и подалеци, такъже из садом, зо всим на всим, пну Процикови, обивателю Жуковскому, за суму готовых грошей десят копъ, ни в чом непенние и незаведенние, в сели Жукох; я сам, матка, жона и потомки мои отдаляем всих близких и далних кревних и повиноватих моих.

  Волно ему будет, жони и потомком, Процикови тими всими кгрунтами вичне владити, дати, продати и даром дати позволяю Процикови у вичност, при котором торгу ншом били люде зацние: Лаврин Супруненко, Яков Плюйко, Іван Педос, Андрий Кишинский, Іляш Дмитренъко и иних много. В Жукох, 1669, мсця мая 13 дня.

—————