Справа Харка, Мостового зятя, з Ивончинецъ, 1670 г.

— 181 —

184. (л. 132).

   Року 1670, мсця феврал: 26 дня.

   Пред намы Олешком Кованкою, на мѣсцу полковницкомъ, Петром Мисенъком, судею полку Полтавского, Клима Чорнушенка, атамана городового, Кости Кублицкого, Лучки Даниленъка, войта, Левка, бурмистра, и при многих зацних общих особахъ.

   Стоячи публѣчне, Харко, Мостового зят, з Ывончинецъ с притомностю пристойних особ, висланих зо всей громади Івончинской, Івана Мусѣенъка, атамана сѣлского, Олексѣ  Бѣлашенка, Васка Сивака, Івана Шибилиста и многих, показовали от в[с]ей громади атестацию и свѣдка становили Мисчиху Прядчиху, доводячи и у вочи мовячи Хвесковы Бакълийскому: Ты-с, Хвеску, давний злодей, крал ти в Сивака сѣно и прохал ес его в городе пред Микитою Бузовим, на тен час атаманом, и пред Горбанем, войтом, и дал ти, Хведоре, нагородивши Сиваку выкъладу готових грошей 4 золотые и три возы сѣна нагородилес и виною злодейскою карано тебе. Конопълѣ покрал ти в ночи в Маренича и верталес тертими .  А Прядчиха мовила: Брал ти, Хвеску, з гумна Харкова потай ячмѣн в четвер масляний поран, дай, Бже, жеби-м такъ свѣтъ выдѣла з дѣтъками моими, яке-м тя видѣла в тих твоих учинъкахъ, щос Коровѣ тые снопы дал.

   Выслухавши теди мы поводовой сторони, а поглядаючи, же Хвеско жадного виводу о собѣ не дал, а найбарзей выкидалися з десяти таляров Сивакъ, здаючися на всю громаду Івонъченскую, же всѣ свѣдоми, же ест здавна подойзрений чоловѣкъ, навет такъ твердили: Барзо-б добре, ижби Хвеско межи нами не мешкал.

   Выдячи теди мы подойзреного Хведора Баклыйского, декъретом прикрили-смо з розделу 14, артикулу 26, о краденю збожа всякого, такъ мѣетъ бити каранъ, якъ и иные злодѣи: горломъ даровавши Хвеска, мѣетъ Харка упросит, нагородивши шкоду и правние викълады от мала и до велика і намъ належную вину врядовую з выдкищиною. Справу сію велѣли-смо в книги меские вписат, що и ест вписано, року и дня вышъменованного.

_________

Справа Бѣлаша з зятем своим Василем Ризенъком на Гаврила Башту Рибцовъского, 1664 г.

10. (л. 19).

   Рок 1664, мсця ноевърия 19.

   Предо мною Олешком Кованкою, на мѣстцу полъковъницком, и при мнѣ бивъших Манца Хведоровича, атамана, Петра Карповича, войта, Якова Манченъка, бурмистри, Тимка, атамана Рибцовъского, и инихъ, вѣри годних особ не мало.

   Ставши порсоналѣтер, Бѣлашъ з зятем своим Василем Ризенъком ускаржалися на Гаврила Башту Рибцовъского в тен способ: Пнове, Гаврило, мало дбаючи о карност, же людем шкод не мало зоставил в крадежи комор, а зособна въ зятя моего Василя час немалый боба промешковала, кгосподарства доглядаючи, тая, обобравши зятя мого, пошла преч, которую бабу самъ власный Гаврило выпровадилъ зо въсѣмы рупесками за Днѣпр, подобно к Жаботину.

   Теди-смо казали Гаврилу пред собою стат для слушного выводу, которий, ставъши, жадного выводу не давши, але овъшем добровлне зналъся, же тую бабу з рупесками перше выпровадилъ, ажъ, к Решетиловъци, якобы толко за нагороду полъ зол[отого], где теж и Бѣлаш, тую бабу в Решетиловъце постигнувши, обобрал, пред вряд не постановивши.

   Теди-смо уваживши на скарги Бѣлашовы и видячи Гавърила Башту, же о злочинци вѣдомост мѣлъ и перехововалъ, декрет ведле розделу одинадцатого, артику[ла] 36, таким же поблѣкованем проступцею чиним, скаравши виною злодейскою. Справу сию казали-смо в книги меские Полътавъские записат, що и ест записано.

   Въ том же роздѣлѣ 12, артикул 15.

   И роздел 14, артикулъ 13.

_________