Справа Костева Шапочникова с Кондратом Шапочником, 1671 г.

99. (л. 225 об.).

Справа Костева Шапочникова с Кондратом Шапочником.

   Року бж: 1671, мсця іюл: 22 дня.

   Пред насъ Федора Жученъка, полковника войска его царского прес: вел: Запорожского Полтавского, и при бытности Олешка Кованки, атамана городового, с товариствъ теж пна Демяна Gуджола, Сави Игнатенка, асавула полкового, Яремы Марченъка, Івана Роздайбеденъка, з уряду теж меского Семена Яременъка, войта, Левка, бурмистра, з братѣ теж цеху кушънерского: Івана Кулака, цехмистра, Яска Пашъковского, Устима, Курила Воскобойника, и пред многими зацними особами.

   Ставши публѣчне, Кост Шапочникъ жалосливе скаржился на Кондрата Шапочника, так мовячи: Мои ласкавие пнове, юж то не по еднокротие от Кондрата великое зелженя поношу, правне з ним поступуючи, а онъ, Бга не боячися, а нѣ заруки вложоной варуючися, справу взновляетъ. А я пред мл: вшею хощу вивод дати о своем цнотливом мешъканю, бо любо то нѣякуюс спѣжъ 1) менует турбовано мя за тое, але то под часъ експедіции в тых краях на ярмарку купилем собѣ спѣжі, яко несвѣдомой.

   Теди-смо, по вислуханю скаргъ, казали Костеви пристойних людей становит, хто пред тим в Кубличи зоставал.

   Напрод старушъка Нахимиха под сумленем і боязню бжею визнала о вихованю Костя Шапочника и о цнотливих поступъках его свѣдома-м, иж онъ ест цнотливий и в жадном злом учинку не подойзрений.

   В то-ж слово визналъ пнъ Анъдрей Нахименко, о цнотливом мешъканю здавна Костевом осведчивши.

   Потрете Ісай Смѣлянский визнал, втож бивший обивателем Кублицким: Пнове, здавна знаемый нам пнъ Кост Шапочникъ, и в жадном злом учинъку не ест подейзреним; его Кондратъ нецнотливе поблѣкуетъ.

   Почварте Анъдрей Довгополий, зацный товариш, пред тым бивший обивател Кублицкой, а тепер Пултавский, визнал под сумъленем дши своей Костя Шапочник зацне, поцтиве з молодости лѣтъ мешъкал в Кубличи, жадних злостей на него не показалося нѣкгды.

   Яко-ж и з цеху кушънерского все братство о цнотливом мешканю Костевом ясне виразили, а в остатку Анъдрей Кондрату очне мовил: Станови едно ты, Конъдрате, того Богдана, на которого ся слова всадивши, члка цнотливого Костю хлѣба хоч збавыти. Такий же и той Богданъ потварца, як и ти!

   Мы теды, вислухавши слушъного свядомя от зацнихъ особ, а поглядаючи на писмо, поданное от попадѣ Тетяни Бакълийской, яко теж и в справе пред братіею, що Кондратъ ревѣковал своей справи, а тепер за неповстягливост губи своей и не варуючи заруки вложоной, взнурилъ тую справу,—Костеви Шапочнику тую-ж му зацност приписуем, якъ и пред тим цнотливим зоставал, приказавши, аби Конъдратъ, Костя упросивши, всю утрату правних викъладов от мала і до велика нагородил з нагороженем нам вини вложоной.

   Справу сію окончивши, велѣли-смо в книги меские Полътавские вписат, що и ест вписано, року и дня вишъ манованного.

_________

1) Мѣдь. 

Записъ Костев Шапочников, 1670 г.

97. (л. 224 об.).

Записъ Костев Шапочников.

   През росказаня его мл: пна Феодора Жученъка, полко[в]ника вой: его цар: прес: вел: Запорожского Пултавского, и при пну Олешку Кованце а п: Гарасіму Прогонском, сотънику полковомъ, Дмитру Горбаненку, А[н]дрею Римару, Левку, бурмистру, и при многих общих особахъ, преписано слово в слово, которий записъ такъ ся в собѣ мѣетъ, принятий до книг:

   Я Любка, попадя Бакълыйская попадя бившая, чиню вѣдомо сим моим писанем: иж Кост Пудленъко, обивател Пултавский, а пред часи обивател Кублицкий, которий зоставал винъним матцѣ моей небожчице Маріи, попадѣ Кублицкой, пятдесят зол:, що и отдалъ мнѣ, Любцѣ, оный долъгъ пятдесят зол:; в чомъ его квѣтую и даю ему сые пысмо мое Костеви Пудленъку, вѣчними часы абы за мое добро не важился нѣхто его, Костя, турбоваты, я и дѣта мои, так тыж и с кревних моих, близких і далних, абы нѣхто важітися не мог чинити турбаций, що оний Кост не винен нѣ в чом, яко цнотливий и вѣри годный ремесник, которому за для очищеня даю сіе писмо мое при людех зацних и вѣры годных: при Захарце Старом, Івану Вубломъ и при отцу Яремѣю и Мартину, пономару, обывателей Бакълыйскихъ.

   То-смо записавши, подаемъ до рукъ пну Костеви, року 1670, мсця октоврия 28 дня.

   А на сий часъ вписано до кних меских Пултавских за для очищенія Костеви при особахъ вишъ менованних.

_________