Записъ от пана отца на дворъ полтавский и на грунта Диканскіе, року 1680
Я нижей подписанний чиню сим моим писанем кождому, кому о том вѣдати належит, в особливе всѣм кревним моим ближним и далнимъ, ижъ маючи я власть зуполную у власных моих добрахъ, нѣкому непенних, а хотячи жебы дѣти мои Василий Кочубей, зять, и Любовь Феодоровна, дочка, судбами божими и благословением моим отцевскимъ в звязокъ малженства соединение, слушне за живота моего подлугъ приреченнаго слова были уконтентованны, з волноѣ волѣ и здорового умислу, а надто з повинною отцевскою призрѣнія дарую и надаю им вѣчне домъ мой власный, власным коштом и стараннемъ моим на пляцу моим отчистим побудований в мѣстѣ Полтавѣ при парканѣ противко дому всечесного господина отца Луки Семіоновича протопопа полтавского, в тилу домовъ Петра Яковенка Жученка, сотника полтавского братанича моего, и Тимчихи братовоѣ моей, положенье свое маючий, зо всѣм яко ся в собѣ маетъ, и з коморою под дзвонницею церкви свято Пречиской накладом моим за зезволенемъ церковнаго братства споряженною. И к тому надаю и потвержаю имъ вѣчне часть лѣса моего отчизного, под Диканкою будучого, Жуковим рогом именуючогося, іную яко от той части лѣса, которую при себѣ заховую: граница взявши от колодязя нового дорогою на узлѣссе по ворота, и з другое стороны от того ж колодязя балкою в лѣсу лежачою на взлѣси жъ до долины, в которой той долинѣ закупъ на греблю занятый, и в той же части лѣса сѣчъ старая Жукова, такъ же и на долинѣ Жуковой закупъ на греблю мною здавна занятый никому непенний; и сѣножать на Середней Голтвѣ власная моя противко сѣножати Петровое Яковенковое, братанича моего, и Івановое Серединое лежачая, им, зятеви и дочцѣ моей, вѣчне належати мает, а поневаж и хата в Диканцѣ з броварем и з полем, до нее належатим, якую я был продалъ дочасне приятелевѣ моему Семенови Кградзенкови за суму грошей сто и сѣмдесят золотих полскихъ, есть грошми помененное дочки моее з наданя юж мною приспособленими откупленна; теды и тое хати и бровара и поля пахатного я зрекаюся, а при них зятевѣ и дочцѣ моей тое заховую и записую вѣчне, а дарую и о родѣ упоминаю именем божимъ, абы сего моего запису и выраженого в нем постановленния такъ взлядом дому и комори в мѣстѣ Полтавѣ, яко и взглядомъ добръ, в Диканцѣ и около Диканки лежачих, в сем записѣ именованных жаден такъ з обчих людей, яко и з кревних моих нарушати не важилися, и в заживаню того наданя моего им, дѣтем моим и их потомкомъ найменшое перешкоды чинити не смѣлъ, що абы было такъ за живота моего, яко и по смерти моей вѣчне, моцно и твердо, ту ж на сем записѣ имя мое рукою власною подписалем, и для явных документовъ обчим годнымъ особамъ подписатися допустилем. Писано в Полтавѣ року А.Х.П. (1680), ноемврия К.S. (22) дня Федор Жученко сей тистаментъ видалъ заживота зятем своим пану Василію Кочубею зятеви своему и Любовѣ дочцѣ своей.
Промоны о подпис руки Стефан Иванович Козупский.
Писар того запису Влас Махненко рукою власною.
Прошоный с сему запису панъ Прокопий Левеницъ, вмѣсто его Влас подписал Жукъ, Феодор Зажиный (?) священникъ, Микула Биршан протопопа Лодижинский, Лука Симоновичъ протопопа Полтавский руку подписалъ и печать приложилъ. Леонтий Чернякъ полковник войска его ц.пр. величества Запорозкого подписался, при подписе руки печать свою притиснул.
(п.) (п.) (п.) (п.).
