Запысъ Педоров Сулыменков з Будищ Великих, 1667 г.

— 4 —

6  (л. 1 об.)

Запысъ Педоров Сулыменков з Будищ Великих, данный от Гаврила Сѣдаченъка на купълене gрунтов, сѣножати на Говътве, преписан слово в слово, которий так ся в собѣ мѣет:

   Року 1667, мсця іюля 28 дня.

   Я Гаврило Сѣдаченъко, обивател Тахтавуловский, вѣдомо чиню симъ вѣкуистим пысмом моим, кому будетъ оказано, иже-м з доброй воли моей продал Федору Сулименъку сѣножат на Говтве Островерховскую, которую мѣю за свою власную працу, в межу с Педосом и с Хвылоненками, пустилем у вѣчност за суму готовых грошей за девятдесят зол: сполна Полской лѣчби. Волно будетъ мененному Феодору и потомком его тоею сѣножатю владѣти, дати, продати и на свой пожитокъ як хотѣти обернути, що за для ствердженя даю до рукъ Феодору сіе пысмо мое, при бытности Клима Чорнушенка, судѣ полкового, Демяна Gуджула, атамана городово[го], Хведора, войта, Патѣя, бурмистра, и при многихъ общих особах, що за для лѣпшой вѣри даю до рук Педору сие писмо мо[е].

_______

Запис Яцков, Бровъковъ зятев, на сѣч на Орели, 1667 г.

47. (л. 188 об.).

   Року бж: 1667, мсця декаврія 16 дня.

   Пред нами Демяном Gуджулом, атаманом городовим, Клымом Чорънушенком, судею полковим, Феодором Андрѣенъком, войтом, Васком Кошляком, Патѣем Матъфѣевичом, бурмистрами, и пред многими особами.

   Ставши устний персоналѣтер, Яцко, Бровъковъ зя[т], обывател Пултавский, визнал явне, ясне, доброволне призналъ ку записаню до книг наших меских Пултавских в тен способ: Мои ласковие п-нове, з доброй воли моей, а не примушоне, продалем Стефану Gонтовому сѣч на Орели, а до тоей сѣчи увъзменев 1) три, а тая сѣч в Красного тополя, пустилем п-ну Стефану тую сѣч за вола едного и за едни пчоли, отдаляючи от себе самого, жоны и потомства мого; волно будет Стефану тоею сѣчу владѣти и изами, дат, продат і даром дат и на свой пожиток як хотѣт обернут.

   То-смо слишачи от уст Яцкових, велѣли в книги меские Пултавские записат, що и ест записат . 

_________

1) Узъмінь — самое глубокое мѣсто въ рѣкѣ съ быстрымъ теченіемъ, незамерзающимъ зимой (Б.Д. Гринченко, Словарь, т.IV, стр.325).

Запис з ураду Полтавъского Федору Жученку на gрунтъ, 1665 г.

20. (л. 173 об.).

Запис з ураду Полтавъского Федору Жученку на gрунтъ.

   Року бжого тисеча шестсот шестдесят пятого, мсца ноеврия 23 дня.

   Перед нас, Григория Вѣтязенка, полковника вѣрного войска его цръского вел: Запорозкого [Полтавского] Артему Донцу, атаману городовум Полтавъскум, Семену Федоровичу Горбаню, вуйту, Максиму Бѣлобородку, бурмистру, Микитѣ Анъдрѣевичу, Климу Чорнушенку, Івану Обѣденку, Анътону Кравцу, ІІилипчати Іванчученку і иних товаришах і мещанах, при том бывших, не мало.

   Федор Жученко, товариш наш, пленѣпотенте обозвавшися до gpyнътy Хими Зымихи, тютки своей рудное, котерая, зходячи з сего свѣта, набутим способом за копу працѣ мужа своего і своюй мѣла от Дмитра Горбаненка, а сходячи з с того свѣта, отказала тот дум свуй власний на церковъ бжую Успения Престой Бци Полтавъскую, до которого дому ближшим одозвавшися преречоний Дмитро Горбаненко, а дойшовши до ктиторовъ тоей церкви бжей і братства, упросил и откупил, бывши по близкости до того дому по небожчицѣ вишей реченнуй Химѣ Зимисѣ; которого заживаючи з жоною і потомками своими, самъ помер; жона его Васка Дмитриха, не удержуючи дѣтем своим того дому, в сем року вишей менованнум продала Лукашу Петровичу без вѣдома ураду нашего і братства церковного, а барзѣй кревних і до того gpунтy ближших; тот зас Лукашъ, купивши, записом на врядѣ того собѣ не дойшол і занедбал, чого пнъ Федор Жученко довѣдавшися, яко ближший по руднуй тютцѣ своей, до того одозвался і правне того дойти прагнулъ.

   Мы теди з усею зуполною радою товарискою і судом правним приказали-смо Федору Жученку суму тую Лукашу Петровичу, що он Горбанцѣ дал, то естъ копъ деветнадцет а копу за могорич, абы отдал а по близкости в том дому і gрунтy на потомние часи посесором былъ, що і виш менованная Горбанка з Дорошом, сином своимъ, того Жученку дозволяли, а не збороняли, і оного от тоей близкости не отдаляли.

   Мы теди, урад вишей помененний, тое ухваливши, казали-смо до книг мѣс[ких] Пол[тавских] записат, що Дорош Горбаненко признал, же тилко Яким, зят Чигиринчин, та он на тум могоричу был, а третая матка, четвертий Лукашъ.

_________

Записъ Маринъ Трохимишинъ, 1667 г.

25 (л. 9 об.)

Записъ Маринъ Трохимишинъ принятъ до книг миских и преписанъ слово в слово, который так ся в соби миет:

   Року бжия 1667, мсця октоврия 9 дня.

   Пред намы дворянами и судями войска Запорожского енеральными, Петром Мыхайловичем Забилою, Павлом Гавриловичем Животовским, Павлом Костанътиевичемъ, асаулом енеральнымъ, и при бытности Савы Федоровича Омелницкого, на тенъ часъ полковника Пултавъского, Артема Донца, атамана наказного городового, Клима Чорнушенка, суди полкового, Мыхайла Гончара и иныхъ общих зацныхъ особ. 

   Ставши пред судомъ ншим , пни Трофимовая Маря Искровъна доходила часты свое, прыналежной ей в Соколим байраку, яко тежъ и в синожаты, к тому байраку належачой ……ше 1) подал, такъ словне выразывшы: Мои ласкавие пнове! Еще за врядов панских тенъ байрак пны, под себе подгорнувшы, меновалы его отбизкым; теды небожчик Иванъ Искренко, братъ мой, с небожчикомъ Трофимом, мужом моим, не попускаючи того байраку от себе, але, яко за власную отцевщину свою ставши, откупыли в пнов той байрак, десят давши таляровъ; напотом юж, яко на своем власном, признаки значные положивши и окопавши Иванъ Искренко з Иосифом Искренкомъ, братумъ моим, и мое теж крило в том байраку зоставало на власной отцевщини моей откупленой, а Иваново Искренково и Иосифово зособна в том-же едном Соколим байраку. 

   Выслухавши мы скарги пни Трофимовой, высилаем Клима Чорнушенка, судю полкового, и при нем Олександра Никифоровича, писара городового, абы там, слушне углядивши, част належную в том байраку, яко теж и в синожати, вказано пни Трофимовой, так приказавши, абы Иосиф Искренко не пречилъ, з сестрою своею Марею миет половину того байраку пополам роздилиты для тое прычины, поневаж и сам небожчик Трофим заедно з Иваном Искренъком доходили того байра- // 

____________

1) Первая половина слова утрачена.

ку в пнов правне. Где посланные от нас оглядивши того байраку, роздиливши з Иосифом Искренком пополамъ и признаки положивши, так тиж и синожат, не займуючи половины байраку и синожати пни Ивановой Искренковой, варуючи в том, абы пни Трофимовая жадных перешкод ни от кого в том не узнала, под виною ста таляров. К сему писму велили-смо печат судейскую и городовую Полтавскую притиснуты. Диялос в Полтаве, в дому Семеновом Герциковом, року и дня вышъ менованного.

Внизу приписка:

   Року бж: 1673, мсця октоврия 19 дня. 

   За видомом вряду ншего миского Полтавского, при битности Дмитра Горбаненка, атамана городового, Клима Чорнушенка, суди, Захарии Мудрика, войта, и инихъ особ. 

   Уистила пни Трофимова, давши Иосифу Искренкови, братови свому, копъ три за част окопу в Соколим байраку, що Иосифъ свого прикладу копачом виложилъ; взявши тие Юсипъ три копи до рук своих, просила пни Трохимовая, аби про памят записано било, що-смо на жаданя еи позволивши, велили записать.

_________

Справа Грицкова Чалого з Супруновки с Хведором Бур[ма]кою и з Данилом, 1668 г.

134. (л. 96 об).

Справа Грицкова Чалого з Супруновки с Хведором Бур[ма]кою и з Данилом. 

   Року бжія 1668, мсця іюня 28 дня. 

   Пред нами Климом Чорнушенком, на мисцу полковницком, Иваном Красноперичем, атаманом городовим, Гаврилом Куренювского хутора, Радкомъ, Невудничого зятя, Иляша Дудки, товариствъ, з уряду теж миского Семена Хведоровича, вуйта, Якова Манченка, бурмистра, Грицка Омелницкого і иных много вири годних особъ, так козаковъ, яко и пновъ мещановъ, обивателей Пултав[ских].

   Ставши обличне, Хведоръ Бурмака заедно з Данилом Вигунским скаргу и жалобу свою прекладали на Грицка Чалого, показуючи свядомя, на писме поданое з Мерехве, яко теж и у вчиненю слушной справедливости показували писмо от пновъ судей енеральных.

   Теды-смо мы, видячи обохъ сторонъ пред собою и вислухавши конътроверсие и пропозыцие, досит чинячи справедливости стой, велили-смо Хведору и Данилу устных свидков становит пристойних, виры годных, не подойзренных, стосуючися ведле права посполитого з розделу четвертого, з артикулу 81-го, где ясне освидчает сведецтвом двухъ, албо трех особъ сторона речъ свою одержитъ.

   Теды Хведоръ Бурмака з Данилом становилъ свидка Марушку Микитиху, шинкарку Мерехвянскую, якоби тая инъстенъте свидома з мужем и з сыном, ижбы Грицко дийца сыру и маслу Даниловому. На то впадаючи, и Бурмака, тож не миючи слушного докуменъту, доходилъ и порозумивалъ на Грицка-жъ о вибраню комори.

   Теды тенъ свидокъ Марушка Микитиха пред всими ясне, явне освидчила: Ни знаю и ни видаю жадного подойзреня на Грицку, а нимъ тоби, Бурмака, не говорила на Грицка.

   Теды Бурмака и Данило становили и іных особъ: Зуба, Лукяна Гладкого и Хведора Гладкого, якобы тые слышали от Микити, мужа Марина, о вибраню комори на Грицка, – и тые того не признали, же той мови пред врядом Мерехвянским на Грицка о вибраню комори не было.

   Вирозумивши теды мы свидка того Марушку, а уважаючи, иж много звикли шинкомъ бавлячиеся и ледащо плести, аже теразъ заприлася, слова свои в уста беручи, предся хлосту добрую велили-смо оной явне пред всим миром дат, що и отримала; а сторона поводовая и отповидная, // до згоди промеж себе пришовши, прощеніе получили, аже-м Бгъ обявит дийцу тых шкодъ, и на потомные часы варуючи прето, а видячи Грицка Чалого от давних литъ в найменшом подойзреню не зостаючого, тую ж [е]му зацност приписали-смо, якъ и пред тим цнотливим зоставалъ; а где бы ся хто важилъ на чест нагонят Грицку Чалому Хведоръ Бурмака, албо и Данило, так тий и кождый посполитий члвкъ, на такових вкладаем до шкатули войсковой сто талярей, а на вряд нашъ миский Пултавский десят талярей. Справу сыю велили-смо до книг наших миских Пултавских записат, що и естъ записано, року и дня выш менованного.

_________

Справа Юска Шишаковъского с помощниками его, 1667 г.

98. (л. 72 об.).

Справа Юска Шишаковъского с помощниками его.

   Року бж[ого] 1667, мсця іюл[я] 2 дня. 

   Великаго гсдря нашего его царского пресвитълого вел[ичества] предо мною дворянином и виръного войска Запорожского полковъником Полътавъским Григорием Витязенком, при битности теж вряду городового Полтавъского и много вири годних особ: Клима Чорнушенка, суди, Кондрата Барабаша, атамана городового, Михаила Стефановыча Гончара, Олексия Салдата, Гринца Трихваненка, Івана Пустогвара, Лучки, з мещан теж Семена Хведоровыча, войта, Василя Кошъляка, бурмистра, и иных много. 

   Ставъши побличне, Юско Шишаковский с помочниками своими ускаржалъся и доходилъ правне на Мартину Буцкому, обывателю Полътавъскому, в тые слова мовячи: Мои ласкавие панове, жалосне нам на Мартина: коня, которого милъ от зятя своего Дацка, и завод правный о том былъ, и такъ розумием по Мартину, иж бытностю своею в Боркахъ бывъши, сприялъ зятю своему Дацъку, которий поменений зят, чуючи ся в злом своем поступъку втек.
   Теды-смо, выслухавъши скарги поводовой сторони, велили Мартину на отповид стат, которий Мартин, ставъши, таился того, даючи слушний вывод з себе, иж о збеженю зятя своего жадною мирою не видал, на що и писмо для свядецтва и за очищеня отримал от намесника Бурковъского.
   Теды-смо вырозумивъши писмо, данное от намесника Бурковъского, обом сторонам двояко догожаючи на оби сторони, предця 1) ведле слушъности и права посполитого з розделу четъвертогонадцат, з артикулу двадцатого, вы- //
____________
1) Все-таки, однако.

дячи и знаючи по Мартину от давънихъ часовъ, иж он доброй слави и неподойзрений, декъретом ствердивъши, ижбы Мартин самотрет отприсягся; теди поводовая сторона, не допустивъши Мартина к присязе, позволилися, ижбы Дацъка где колвек постигши, яко зрайцу своего, волно им было взят и з ним правъне поступит в кождого суду и права; справу сыю велили-смо в книги миские Полътавъские записат, що и ест записано.
_________

Записъ Оленин Прокопишин з Жуков на куплене gрунътовъ, 1676 г. (продолжение)

87  (л. 41).

   Року 1676, мсця августа 4 дня.

   Пред насъ Олешъка Кованки, суди наказного полкового, Клима Чорнушенка, атамана городового наказного, Максима Попенка, войта, Левка, бурмистра, и при многих общих зацних персонах.

   Доходили Олена Прокопиха Жуковна с потомками еи купленого gрунту на Сохацковни Наливайчиси, в которий Наливайчиха неслушне ся втручает, менуючи купъленим способом мити, а купчей слушной не миетъ.

   Мы теды, выслухавши скарги Прокопишиной Жуковниной, казали вивод и свядомя слушное давати: яким би способомъ мила довести, якъ би тые крунта небожчикъ купил в Івана Корниленка, записавши в Жукох, а не в городи?

   Теди Проциха с потомками еи, давши о томслушний вывод, і атестацию врядовне [з] Змиева нам для прочитаня подала, же тие gрунта миетъ купленим способом, якъ ест обширней написано в той-же атестацие; куплю небожчикову Процикову и продаж Корниленъков вичне при моци заховуем, а Наливайчиха не миетъ ся в тие крунъта купление втручати, под виною десяти таляров. Писан в Полтави, року и дня вишъ менованого.

—————