Записъ Ивановъ Говтвяниченковъ, жителя Полтавского, данний од Тимоша Патѣенка, жителя жъ Полтавского, 1699 г.

№ 407

Записъ Ивановъ Говтвяниченковъ, жителя Полтавского, данний од Тимоша Патѣенка, жителя жъ Полтавского, на кгрунта купление, приятъ до книгъ мѣскихъ Полтавских.

Року  АХЧФ  (1699) , мѣсяца Октовр ,  КВ  (22)  д.

   Пред нами, Петромъ Буцкимъ Судиею Полковымъ Полтавским, при битности Якова Ивановича Войта, Алексѣя Матвѣевича Бурмистра и при многих значнихъ общихъ персонахъ.

   Ставши, Тимюш Патѣенко, жител Полтавский, виразил явне, ясне, доброволне и непримушоне ку записаню до книгъ мѣских Полтавскихъ, повидѣвши в тие слова: “Мои ласкавии Панове, з доброй волѣ моей и за згоднимъ призволенем ся жони, потомков, повиноватихъ и кревнихъ, близкихъ и далекихъ, продалем кгрунта отцевские и дѣдизниии, нѣкому нѣ в чомъ непенние, лежачии на Говтвѣ, яко то лугъ, островъ з сѣчю, сѣножат, футоръ и поле робочое все за шляхом, плесо и узмѣнь нижший, пополамъ Петрового Гончарового Патѣевого зятя, Ивану Говтвяниченку за певную суму монети доброй личбы Литовской, за сорокъ талярий. Которимы, прето, купленими от мене ему, Ивану Говтвяниченку, кгрунтамы, жонѣ и потомком его волно, якъ хотѣти владѣти, жадное кривди и турбации нѣ от кого не узнаючи, варуючи в кождого суду и права”. При которой купчой и запису и Петро Гончар бувъ. 

   Мы теды, вишеменений Урадъ Городовый Полтавский, на жадане запису обоихъ сторонъ, велѣли-смо Писареви городовому Полтавскому в книги Мѣские вписати и випис з Книг потребуючой сторонѣ при звиклой Печати Городовой Полтавской видати росказали-смо. Писан року, мѣсяця и дня виш положеного. 

Записъ Пана Лесков Черъняков на куплення крунтовъ в Тимка Кузъменка, в козака Тахътавуловъского, 1660 г.

Арк. 154 зв.

№ 248

Записъ Пана Лесков Черъняков на куплення крунтовъ в Тимка Кузъменка, в козака Тахътавуловъского, принятъ до книгъ наших мѣскихъ Полтавъскихъ, которий так ся в собѣ мѣетъ.

   Я, Тимко Кузъменко, обивател Полтавъский з села Тахътавулова, вѣдомо чиню сим доброволним писмом моѣм, ижем з вѣдомостю и за позъволенням отъца моего Кузъми и всѣхъ приятелей нашихъ близъкихъ и найдалшихъ продалъ зятю моему Лескови Черъняченкови всѣ крунта, дом з садом, з нивъемъ и зо усѣми приналежностями, що заживал отецъ мой, якожъ и я по отцу. Тедим то з доброй воли моей пустил у вѣчностъ приятелеви моему Лескови Черъняченкови за суму готовихъ грошей чотириста золтихъ полской личбы доброй монети. Волно будетъ Лескови Черъняченкови, жонѣ и потомком его тими грунтами владѣти, дат, продатъ и даром латъ, жадно нагабання, перешъкодъ и туръбаций правънихъ не од кого не поносячи, такъ од мене самого, чко тежъ и од братий и од усѣхъ приятелей нашихъ, що задля лѣпъшой вѣри твердости за вѣдомостю вряду меского Полтавъского, особъ нижей менованнихъ писмо мое до рукъ Лескови подаю, при подпис рукъ с притисненням печати меской Полтавъской.

   Писан у Полтавѣ, рок  АХS  (1660), мѣсяця Окътовърия  КФ  (29).

     Михайло Гончаръ, на мѣсцу Полковъницъком.

     Манецъ Хведорович Атаман, Петро Карпович Войтъ, Васкоко Кошъляк Буръмистръ

Справа Перехриста Смѣлянского и Ганны Стрѣлихи, 1664 г. (продолжение)

6. (л. 17).

   Рок 1664, мця октовърия 28 дня.

   Предо мною Михайлом Гончаром, на мѣстцу полъковъницком, и при мнѣ бивших Манца Хведоровича, атамана, Петра Карповича, войта, Васка Кошляка, бурмистра, райцовъ меских Полътавъскихъ.

   Ставши к той справе, Яцко Перехристъ Смѣлянский давалъ з себе слушний вывод Ганнѣ Стрѣлисѣ прячися, же жадною мѣрою а нѣмъ грошей от Стрѣли не бралъ и не вѣдаю его, навет кгды бы то мѣло би ся на мене показат, худобу от мала до велика повиненъ буду тратит, навет карное на горле самъ на себе вкладаю. Теди-смо, слишачи то от Яцка, казали наочне Ганнѣ Стрѣлисѣ ставит Петра Дейнеку Смѣлянского, иж бы того доводилъ Яцку Перехристе. Видячи теди Петро фалшивое свое вданя, не ставъши перед вряд, скрилъся.

   Теди мы, вряд меский Полътавъский, уваживъши, же Петро, не вѣдаючи навет імени Яцкова, Михалъкомъ меновалъ, фалшивого свѣдка мѣем Петра Дейнеку, а Яцко ІІерехрист, яко вѣры годний; позволивъши Яцку, где би мог постигнет Петра Дейнеку, правне з ним поступовал, всей утрати своей и правних выкладовъ доходячи, где би ся мѣла тая справа приточит. Тую-смо справку казали въ книги меские Полътавъские записат, що и ест записано.

_________

Справа Василева Мушурувцева з Тахтавулова, 1670 г.

186. (л. 133 об.)

Справа Василева Мушурувцева з Тахтавулова.

   Року бж[ого] 1670, мсця іюн[я] 14 дня.

   Пред насъ Юрка Туболца, суди полку Полтавского, Демка Яковенка, атамана городового, Демяна Gуджола, Михайла Гонъчара, Кости Кублицкого, Івана Мизина, Левка, войта, и при многих зацних общих особахъ.

   Стоячи публичне, Васил жалосливе скаржился зелженя и явний gвалтъ оказовал дочки своей недорослой Евдокии, которую усилне квалтовне, пасучи товар, зgвалтил на полю Тышъко, Величков скотар. — Дявол мя, пнове, на тое подвил, — то зрайца доброволне признал.

   Мы теды, слышачи от того gвалтовника доброволне зезнаня, що и Васил, скотар Демков Осмаченковъ, мовил очне тому Тишъку: Тышъко тую дивчину усилне gвалтилъ, а я михом дивчини очи накинулъ, а самъ од того злого учинъку втекилем.

   По тому стязаню и вицитаню питали-смо Василя: ежели бы соби того Тышка хотилъ за приятеля взяти? 1) Которий с приятелми повидилъ: // 

____________

1) Т. е. спросили отца потерпевшей, не пожелаетъ ли онъ взять виновнаго за мужа къ дочери?

Пнове, рач мя, Бже, варовати, жеби-м соби то[го] збродня мил за приятеля брати! Прошу, нехай будет ведле права стого скаранъ.

   Ми теды с порадою товарискою, ведле права посполитого, запобегаючи, абы тая злост промеж християнством не множилася, ведле розделу 11, артикулу 12, о квалтоване девки и невисти, gвалтовникъ миетъ быти каранъ горлом.

   Те-смо декъретом прикривши, справу сію велили-смо в книги меские вписати, року и дня вишъменованного. 

_______

Справа Юска Шишаковъского с помощниками его, 1667 г.

98. (л. 72 об.).

Справа Юска Шишаковъского с помощниками его.

   Року бж[ого] 1667, мсця іюл[я] 2 дня. 

   Великаго гсдря нашего его царского пресвитълого вел[ичества] предо мною дворянином и виръного войска Запорожского полковъником Полътавъским Григорием Витязенком, при битности теж вряду городового Полтавъского и много вири годних особ: Клима Чорнушенка, суди, Кондрата Барабаша, атамана городового, Михаила Стефановыча Гончара, Олексия Салдата, Гринца Трихваненка, Івана Пустогвара, Лучки, з мещан теж Семена Хведоровыча, войта, Василя Кошъляка, бурмистра, и иных много. 

   Ставъши побличне, Юско Шишаковский с помочниками своими ускаржалъся и доходилъ правне на Мартину Буцкому, обывателю Полътавъскому, в тые слова мовячи: Мои ласкавие панове, жалосне нам на Мартина: коня, которого милъ от зятя своего Дацка, и завод правный о том былъ, и такъ розумием по Мартину, иж бытностю своею в Боркахъ бывъши, сприялъ зятю своему Дацъку, которий поменений зят, чуючи ся в злом своем поступъку втек.
   Теды-смо, выслухавъши скарги поводовой сторони, велили Мартину на отповид стат, которий Мартин, ставъши, таился того, даючи слушний вывод з себе, иж о збеженю зятя своего жадною мирою не видал, на що и писмо для свядецтва и за очищеня отримал от намесника Бурковъского.
   Теды-смо вырозумивъши писмо, данное от намесника Бурковъского, обом сторонам двояко догожаючи на оби сторони, предця 1) ведле слушъности и права посполитого з розделу четъвертогонадцат, з артикулу двадцатого, вы- //
____________
1) Все-таки, однако.

дячи и знаючи по Мартину от давънихъ часовъ, иж он доброй слави и неподойзрений, декъретом ствердивъши, ижбы Мартин самотрет отприсягся; теди поводовая сторона, не допустивъши Мартина к присязе, позволилися, ижбы Дацъка где колвек постигши, яко зрайцу своего, волно им было взят и з ним правъне поступит в кождого суду и права; справу сыю велили-смо в книги миские Полътавъские записат, що и ест записано.
_________