95. (л. 223).
Записъ Стецков Петрашенков на купълене половыни сѣножати в Хомы Деркаченъка на Говтве.
Року 1671, мсця іюня 17 дня.
Пред насъ Демка Яковенъка, атамана городового, и при бытности Сави Игнатенъка, асавула полкового, Петра Мисенъка, Петра Тытенка, Миколая Стефановича, Семена Яременъка, войта, Левка, бурмистра, и при многих общих зацных особахъ.
Доходилъ Стецко Петрашенко сѣножати Хоминой на Говътве, которой боронилъ по одестю Хомыном в слободы, не попоскаючи нѣкому, хотѣлъ любо би купъленим способом од Хоми ку своему пожиткови тую помененную сѣножат обернути, где по зверненю Хомином з слобод владѣлъ Хома Деркаченъко, якъ своею власною, а напотом без вѣдома Стецкова продал Гаврилови за вола, которий волъ в ценѣ пол-осми копи. Теди Стецко, яко несвѣдомий того торгу, одезвался к той сѣножати, будучи и перве оборонцею тое сѣножати предреченой, и не хотячи Гаврилови Gуджуленъку попустити, жадалъ Стецко, любо би при половици тое сѣножати мог зостават.
Теди-смо и того Хому припозвавши, яко теж и Гаврила Кгуджуленка, згодили Стецкови тое сѣножати половина од Стецковой от сажки по дуброву, а Гаврилови кутъ от Дороша к стану Кгуджулову. Где Хома, стоячи, повидѣлъ: Хто заплати то заплати абы минѣ грошѣ. Где того ж часу словне собѣ Стецко и Гаврило ствердивши, дал Стецко Гаврілови за тую половини сѣножати Хоминой десят зол: без чотирох шагов, а Гаврило, взявши за пазуху грошѣ, прощеніе з Стецком отрималъ.
Мы теж по их умѣркованю позволяем вѣчне владѣти Стецкови половиною тое сѣножати, а Гаврилови од своей сторони од Кгуджоловой втож половиною вѣчне владѣти и потомком их, ижбы в том болших заводов правных от обох сторонъ не вщинано, под виною до шъкатулы войсковой двадцати таляров, а на вряд городовый Пулътавский копъ трохъ.
То-смо на жаданя Стецково Петрашенково для свядомя и на потомные часы велѣли до книг н-ших меских Пулътавских вписати, що и ест вписано, року и дня вышъ менованъного.
