Запысъ Демков Яковенков на купене половици ставка от Любки Ивонъчиновни, 1670 року

81. (л. 213).

Запысъ Демков Яковенков на купене половици ставка от Любки

Ивонъчиновни.

    Року бжия 1670, мсця июн: 12 дня.

    Пред насъ Юрка Туболца, суди полкового, и при бытности Левка, войта, Грицка Щербатого, бурмистра, Ивана Мизыненка, Радка Мизиненъка, Олексия Сипаки и при многих зацнихъ общих особахъ.

    Стоячи публичне, Любка Тимчиха Жученъкова зезнала явне, ясне, доброволне, в то слово повидивши: 

    Пнове, отказаная мни част половици ставъка на Ивончинцох по милой небожчици матце моей Стеси Ивончиси Старой, а половица в том же ставку сестри моей Вовди Демъчиси, теды-ся порадившися, же мни бидной вдови, трудна здержати тое половину, пущаю тую мою половину приятелеви моему Демку Яковенку, жони и потомком их, за суму готових грошей копъ осмъ Лытовских и за два быка; волно им будет тим всим ставком обома частма владити, дати, продати в даром дати и на свой пожитокъ якъ хотити обернути, жадних превагабаний не узнавши, такъ от мене самой, и от потомков и от всихъ близких и далних кревних и повиноватых моих.

    Тые-хмо слови слишачи от уст Любчиних Тимчишиних, велели в книги миские Полтавские вписат, що и ест вписано, року и дня вышъ менованного.

—————