Записъ на кгрунтъ Іскренковский од Петра Коваля, жителя Диканского, 1690 г.

— 236 зв. —

№ 334

Року АХЧ (1690), декамврия ЕІ (15) д, Александръ Шадурский, слуга Его Милости Пана Василия Кочубея, Писара Войскового Енералного, подалъ до книгъ нашихъ городовихъ Полтавских записъ на кгрунтъ Іскренковский од Петра Коваля, жителя Диканского, за сумму нижей выразне положоную куплений, которий ся в собѣ такъ маетъ.

№ 334-1

Року тисяча шестсотъ девятдесятого, мѣсяця октоврия, третого дня.

   Пред намы, врядом Диканским, Іваномъ Задорожнимъ Атаманомъ, Левкомъ Кублицким войтомъ, при бытности зацных и вѣри годних людей Якима Балясного, Яреми Ялича, Петра Шовканя, Хведора Бугаенка, Василя Вовка, Андрѣя Голуба, Андрѣя Чыгира, жителей Дыканских, и Івана Галала жителя Будиского.

   Ставши очевисто, Петро Ковал, з сынами своими Наумомъ и Вакулою, сознал явне, ясне и доброволне такими слови: "Ижъ, Панове вряде, мѣючи я кгрунта под Диканкою, лѣсъ з дубровою и з сѣножатмы из ставками, с полемъ, от Воцки Іскровни набитий, которие за власную свою сумму мѣлемъ, за сто таляровъ, а тепер у вѣчную поссесию продалемъ Его Милости Пану Василию Кочубееви, Писареви Войска Ихъ Царского Пресвѣтлого Величества Запорозкого Енералному, Пану нашему, за полтораста талярей и за пят, доброй монети бытими таляреми, еще над выш реченную суму Его милость Панъ Писаръ Войсковий Енералний и фолварок мнѣ надалъ, омежъ того кгрунта стоячий. Теды я, Петро, з сынами своими, и записъ на вишъ реченние кгрунта даю Его милости Пану Писареви войсковому Енералному, жонѣ Его и потомству Его самъ от себе, от жони моей и дѣтей моих и приятелей моих близкихъ и далеких, зрекаючися вѣчне тое продажи, а жебы тимы помянутими кгрунтами, якие я мѣлемъ от Панѣ Іскровны, якъ ся в собѣ мают по тие старие клейна и давние граници, спокойне владѣлъ Его милостъ Панъ Писаръ Войсковий Енералний, Панѣ жона его и потомство Его, и якъ хотѣти на свой пожитокъ оние кгрунта обернути, яко то надати и даровати, а если би тежъ мѣли любъ я, албо жона моя или з дѣтей моих и приятелей моих близких и далеких в оние кгрунта припоменутис, на такового кождого упорного вини Панской прикладаемъ неотступне такую совито сумму, якая нынѣ мнѣ битими талярами отдана и руками моими отлѣчена, яко ся вышой виразне доложило".

   Писано в Диканцѣ, року и дня вишписаного, при особах вишписаних.