Записъ Анъдрѣевъ Матфѣенковъ з Івончинец, 1659 г.

223. (л. 160 об.).

Записъ Анъдрѣевъ Матфѣенковъ з Івончинец.

   Рок[у] бжія 1666 , мсця сепътевърія 9 дня.

   По приказу думного дворянина і воеводы Якова Тимофѣевича Хитрово и с позволенем вряду меского Полътавъского принято писмо купъли и продажи Любчиной и записано до книг меских в то слово:

   Я Любка Стециха чиною вѣдомо писмом моим, иже-смо продала Анъдрѣю хату з нивями и [с] пастовъниками нивъ двѣ под Соколѣм, а една под Геркгеливым рогом, а другая в Лашкова ставъка, за которую хату і грунъта взяла-смо въ Андрѣя воловъ два, едного чалого, другого полового, пустивъши вѣчне Анъдрѣю и потомству его; мѣет спокойне уживат, жадного пренагабаня і турбаций правних нѣ от кого не поносячи, так от мене самой, яко и с потомства мого, под виною, яко ест положено в писму, на пна полъковъ[ника] 20 таляровъ, на воеводу 10 таляровъ, на атамана Івончинского копъ пят. А при той купъли и продажи были люде вѣри годние, на ймя: Васко Сивак, Іванъ Ярмаченко, Іван Поповыч и Тышко Старий, атаман Івончинский. Писан у Івончинцахъ, року 1659, мсця октовърия 3 дня.

   А на сый час в Полътаве рок[у] и дня вишменованого.

   Велено імена врядовие подписат, хто-бы свѣдом сего писма: Семен Хведорович, войтъ, Васко Кошъляк, бурмистръ, и Василий Семенович Москвитинъ и Александер Никифоровыч.